仔仔返學之園PN

18/8/2011

 

仔仔返PN了. 星期五同尋日都可以家長陪上堂.今日就係佢自己返.

嗯.........星期五同尋日都好惡劣.
佢唔跟老師指示(主要應該係唔明粵語老師講咩); 排隊佢會排, 但一耐過兩分鐘佢就開始失去耐性, 會四周圍走; 唔識舉手答問題; 唔肯去廁所; 唔肯坐定定; 唔肯揹書包...... 全唔怕醜.

不過一聽到歌會跳舞, 有野食會自己食, 自己抹咀, 食完擺返好.都叫做有少少令人安慰.

今日係少少喊既情況下上校車, 好在有家姐仔照顧佢, 呢位家姐真係好乖, 仲連續三日幫細佬揹書包, 人仔細細前一個書包後一個書包, 乖到不得了.

 

老師打電話俾我, 話仔仔係學校無喊過, 好happy, 好活躍, 初時唔太聽指示, 但經過老師用英文指示佢, 佢就比較合作.
另外有同學既媽咪報料, 見到家姐仔拖住細佬返學, 仲帶細佬入PN課室, 讚家姐好乖.

工人姐姐話仔仔落校車時好開心.比我想像中好好多, 真係好呀.